Quest project vegn preschentà a tai da
Sur da

Tge è Generation What?

Generation What è in program interactiv producì da France Télévisions, Upian e Yami2 en collavuraziun cun l'Uniun europeica da radio e televisiun e 14 emetturs europeics. I sa tracta d'ina nova versiun da Génération Quoi, in studi a l'engronda realisà il 2013 en Frantscha cun l'intent da crear in purtret da la generaziun actuala da las persunas tranter 16 e 34. Cun la participaziun da 13 pajais, numnadamain da la Germania, l'Austria, la Belgia, la Spagna, l'Italia, l'Irlanda, il Luxemburg, l'Ollanda, la Valisa (UK), la Grecia, l’Ollanda, la Republica Tscheca e la Svizra, daventa quest program in event europeic.

Il program è dividì en trais parts:

  • In questiunari online extendì, creà cun agid da sociologs e disponibel en tut ils pajais europeics che sa participeschan. La finamira da quest questiunari è da perscrutar las finamiras, speranzas e temas da questa generaziun.
  • In purtret documentar e statistic da la giuventetgna svizra che consista da lur parairis cumplettà en temp real cun las datas collectadas via il questiunari.
  • In purtret documentar e statistic da la giuventetgna europeica che consista da parairis da la giuventetgna da tut ils pajais participants e cumplettà en temp real cun las datas collectadas via il questiunari. Sin in'infografica pon ins cumparegliar las respostas dals singuls pajais sin stgalim europeic.

Vegnan mias respostas tractadas a moda confidenziala?

Natiralmain. Nus na dumandain betg tes num. Tut las infurmaziuns en connex cun la vegliadetgna, la schlattaina ed il lieu sco era detagls davart tia furmaziun u occupaziun professiunala vegnan mo dumandadas per intents statistics per che nus possian crear in purtret d'ina entira generaziun uschè exact sco pussaivel. Uschia pudain nus per exempel eruir quants students che ston lavurar per pudair finanziar lur studi. U p.ex. era quants lavurants giuvens sut 23 onns che han il sentiment che lur lavur vegnia stimada memia pauc.

Las datas da profil che nus collectain durant che ti respundas a las dumondas inizialas vegnan memorisadas independentamain da tut ils elements che pudessan identifitgar tai. Sche ti ta registreschas cun tia adressa dad e-mail serva quai sulettamain a l'intent da pudair cuntinuar a respunder las dumondas là, nua che ti has chalà l'ultima gia.

Naginas infurmaziuns u respostas che ti has dà sin questa pagina na vegnan dadas vinavant a terzs e naginas na vegnan publitgadas autramain che per ils resultats dal studi.

 

Co vegn creà il purtret?

Per crear il purtret da la generaziun da 16-34 essan nus ans decidids per ina metoda da trais stgalims:

  • stgalim quantitativ cun ils resultats dal questiunari
  • stgalim qualitativ cun intervistas da video documentaras
  • stgalim cumparativ cun la pussaivladad da cumparegliar ils resultats cun auters pajais europeics a maun da videos ed ina charta interactiva

 

1) Resultats dal questiunari
Tut las respostas da las 149 dumondas vegnan memorisadas ed evaluadas en temp real. Quai vul dir che las respostas ed ils resultats d'ina dumonda pon variar, d'ina giada a l'autra. Plinavant na vegnan las datas collectadas cun il questiunari betg evaluadas statisticamain, pia betg tenor la repartiziun represchentativa da la populaziun dals pajais participants.

Qua in exempel per la chapientscha: Sche 78% dals participants respundan cun "Gea" a la dumonda "Guardas ti optimisticamain en il futur?" e 22% cun "Na", signifitgescha quai che 2'435 persunas da 3'122 han respundì cun "Gea" e 687 cun "Na". Las persunas ch'èn sursiglidas la dumonda (cun cliccar sin Proxima dumonda) sco era lur indicaziuns davart la vegliadetgna, la schlattaina, il lieu da domicil u la vita sociala e professiunala na vegnan – cuntrari a studis d'instituts demoscopics – betg resguardadas en ils resultats.

La constataziun che "78% dals Europeans" u "78% da la giuventetgna èn optimistics areguard l'avegnir" fiss perquai incorrecta. Ins po sulettamain dir che quai è il cas per 78% dals participants da quest studi. Cun agid da filters pon ins focussar tscherts criteris e vegnir a savair dapli davart champs parzials e gruppas en mira.

Qua chattas ti tut las respostas da la Svizra e qua da l'Europa.

 

2) Las intervistas da video documentaras
Nus avain sutdividì il questiunari en 21 temas. Las dumondas tanschan da l'opiniun davart crisas economicas sur l'amur fin a la relaziun cun ils geniturs ed il cumportament social.

Per mintga tema datti in video cun persunas da tes pajais che respundan a las medemas dumondas sco ils utilisaders da l'internet. Ils videos mussan lur opiniuns, dumondas, dubis e persvasiuns. Il medem mument vegnan ils videos cumplettads cun las datas dal questiunari. Sche ti es registrà cun tia adressa dad e-mail, pos ti guardar ina resumaziun dinamica da tias respostas. Quella pussibilitescha a tai da cumparegliar tias respostas cun il total da las respostas.

Insaquantas dumondas dal questiunari èn vegnidas modifitgadas suenter ch'ins ha fatg ils videos, uschia ch'igl è pussaivel che las persunas en il video na respundan betg ad exact las medemas dumondas sco ils utilisaders da l'internet.

Supplementarmain al purtret da la giuventetgna en Svizra pos ti guardar sut "Europa" 21 videos da l'entira Europa davart ils medems temas sco il purtret local.

Sin questa pagina na pos ti betg mo cumparegliar tatez cun il rest da la Svizra, mabain cun tut ils pajais che participeschan a la retschertga.


3) La definiziun da la generaziun da 16-34 en in pled

Per cumplettar il purtret avain nus dumandà ils utilisaders da l'internet ch'èn sa participads a la retschertga d'inditgar in pled sco alternativa per la noziun usitada "generaziun Y" che definescha lur generaziun. "Generaziun Facebook", "Generaziun dirs temps", "Generaziun runda finala" – la suletta cundiziun: la definiziun na dastga betg esser pli lunga che 25 segns.

Qua chattas ti tut las propostas.

Dumondas, commentaris?

Contactescha nus: generation-what@rtr.ch